'''Vabahelle kokkokõla''', (ka '''vabahelükokkokõla''') vai '''vokaalharmoonia''' om keele helüoppusõ säädüs, mink perrä üten sõnan saavaq ollaq õnnõ ütte sorti vabahelüq, hariligult kas õnnõ edepoolidsõq vai õnnõ tagapoolidsõq. Vabahelle kokkokõla om üts [[võro kiil|võro]], [[seto kiil|seto]] ja terve [[lõunaeesti kiil|lõunõeesti keele]] põhiliidsi helüsäädüisi. Niisama om taa üts edimäidsi asjo, mink perrä saa võro ja eesti keelel vaiht tetäq, selle et [[eesti kiil|eesti kiräkeelen]] vabahelle kokkokõlla olõ-õiq. Külh om taasama säädüs olõman pall'odõn tõisin [[soomõ-ugri keeleq|soomõ-ugri]], nigu näütüses [[soomõ kiil|soomõ]], [[kar'ala kiil|kar'ala]] ja [[ungari kiil]], a ka näütüses [[turgi keeleq|turgi keelin]], nigu [[türgü kiil|türgü]], [[tatari kiil|tatari]] ja [[tõva kiil|tõva]] kiil.
Tävvelidse vabahelle kokkokõlaga ommaq näütüses võro keele sõnaq: ''härmävätäi'', ''hõbõhõnõ'', ''küsümüs'', ''esäkene'' ja ''pujakõnõ''; soomõ keele sõnaq ''käyttäjä'' ('pruukja') ja ''tyytyväinen'' ('rahulõ') ni ungari keele sõnaq ''köszönöm'' ('aiteh') ja ''vörös'' ('verrev').
