Tarto Ülikooli majandustiidüskund

Tarto Ülikooli majandustiidüskond om Tarto Ülikooli üts sotsiaaltiidüste valdkonna ossõ. Tiidüskonna juhataja om Vadi Maaja. Tiidüskond om Tarton aadrõssin J. Liivi 4.

Majandustiidüskonna süameasas om köütäq ja edendäq majanduslidsõt tiidmüst riikevaihõlidsõn tiidüsen ja opmisõn Eesti ütiskunna hüäs.

Aolugu

Alostus

Tarto Ülikoolin nakas’ majandustiidüse oppamine 1676. aastal, ku aoluuprohvõsriq pidisiq lugõma majandamistiidüst ni matõmaatigaprohvõsriq raamadupidämist. Edimäst kõrda alostas statistiga ja maatiidüse opituul 1802. aastal ni rahandusõ ja kauplõmisõ opituul tuust aasta ildampa.

Rahvaülikuul

1920. aasta suvõl alost’ õigustiidüskonna man kauplõmisõ osakund, selle et toonaq oll’ noorõl Eesti Vabariigil vaia majandusinemiisi.

Hindäkotsi nakas’ majandustiidüskond toimõndama õkvalt 1938. aastal. Dekaanis sai prõhvõsri Poomi Eduard ja alost’sõq kolm tsihti: rahva- ja riigimajandus, käitismajandus ja kimmätüsmajandus.

Nõvvokogo aolinõ ülikuul

1954. aastal naati jälkiq Tarton majandust oppama, külh agaq üten õigustiidüskonnaga. Ummõhtõ tetti 1968. aastal vallalõ umaette majandustiidüskond. Sis sai dekaanis majandusaoluulanõ Krinali Valner, kiä oll’ tuu ammõti pääl üttekokko 19 aastat. Kooniq 1980ndatõ lõpuniq kand’ majandustiidüskond vastust kauplõmisõ ja rahandusõ asatundjatõ oppamisõ iist ni viil koolitati uurjit.

Vilistlaselo

1997. aastal asot’ tiidüskond vilistlaisi jaos seldsi Hermes, miä om seeniqmaaniq esiqeräline kogo ülikoolin. Tiidüskonna lõpõtanuq ommaq täämbä kitet asjatundjaq, ärijuhiq, majandustiidläseq ja ütiskunnategeläseq. Näütüses om majandustiidüskonna lõpõtanuq Kallasõ Siim, Palo Urve, Alamäe Priit, Rõivasõ Taavi, Kõvaski Katre ja viil mitmõq.

Tiidüskonna hoonõq

Majandustiidüskond oll’ kooniq 1977. aastani Tarton aadrõsi Vanemuine 46 pääl, pääle tuud agaq liinaveeren Nuurusõ uulitsan. 1999. aasta keväjä kolõ tiidüskond keskliina Narva maantii ja Imäjõõ vaihõlõ, kos nä oll’vaq Oeconomicumin 2017. aasta suvõni.

Alostõn 2017. aasta augustiht om majandustiidüskond aadrõsi J. Liivi 4 pääl, innidse rahvaarkiivi majan.

2020. aastal tetäs vallalõ vahtsõnõ hoonõq nimega Delta, kos nakkasõq ütenkuun opma ja tüütämä puutritiidüse, matõmaatiga ja statistiga instituudi rahvas.

Matõrjaliq

1. Majandusteaduskond kolib kaheks aastaks J. Liivi 4 hoonesse. Tartu Ülikooli majandusteaduskond, 2018. [1]. 24.10.2018.
2. Majandusteaduskonnast. Tartu Ülikooli majandusteaduskond, 2018. [2]. 24.10.2018.
3. Missioon ja visioon. Tartu Ülikooli majandusteaduskond, 2018. [3]. 24.10.2018
4. Pisut teaduskonna ajaloost. Tartu Ülikooli majandusteaduskond, 2018. [4]. 24.10.2018.

Välislingiq

• Majandustiidüskonna kodoleht