Islamabad

Islamabad
Pääväperi üleväst: Feisali Mošee, Serena Hotell, parlamendihoonõq, Pakistani monument, Islamabad üüse ja pääministre tüühoonõq
Riik: Pakistan
Suurus: 120 km²
Elänikke: 2 006 572 (2017)
koordinaadiq: 33°43′ N 73°04′ E

Islamabad om Pakistani pääliin. Elänikke arvo poolõst om Islamabad Pakistanin kümnes liin. Tä asus Liidopääliina alal ja om tuu keskus. Liinaelänikke arv om kasunuq väega kipõstõ: ku 1951. aastagal elli sääl 100 000 inemist, sõs 2017. aastagal 2 mill'onat. Islamabadi-Rawalpindi liinastu om suurusõ poolõst kolmas liinastu Pakistanin ja sääl eläs 4,5 mill'onat inemist.

Islamabad asus maa põh'aosan Pothohari platoo pääl Margalla mäkist lõunõ puul. Tä om Pandžabi ja Põh'aõdagu provintsi vaihõl. 1960. aastagil tuudi Pakistani pääliin Karatšist Islamabadi. Liin jagonõs viies tsoonis.

Islamabadi peetäs Pakistani kõgõ arõnõnumbas liinas. Sääl om kõgõ suurõmb kirätundjidõ protsent Pakistanin ja mitmõq Pakistani tippülikooliq, niguq näütüses Quaid-i-Azami Ülikuul, Pakistani Inseneri- ja Rakõndustiidüisi Instituut ja Riiklik Luudustiidüisi ja Teknoloogiaülikuul. Allama Iqbali Ülikuul om üliopilaisi arvo poolõst maailman üts suurõmbit.

Islamabadin om Feisali mošee, miä om kõgõ suurõmb mošee Lõunõ-Aasian ja suurusõ poolõst kuvvõs maailman.