Eesti valitsus
Eesti valitsus (ammõtligult Vabariigi Valitsus) om Eesti riigi täüdeviijä võimuorgan, miä toimõndas Eesti Vabariigi põhisäädüse ja säädüisi perrä. Valitsus vii riigivõimu täüde õkva või valitsusasutuisildõ. Valitusõ juht om pääministri, kink ettepanõkigaq nimmas Vabariigi President ammõtihe tõõsõq valitsusõ ministriq.
2024. aastaga 23. hainakuu pääväst om ammõtin Michali Kristeni valitsus.
Valitsusõ ammõtihe astminõ
toimõndaqVabariigi Valitsusõ nimmas ammõtihe Vabariigi President kolmõ päävä joosul pääle tuu, ku Riigikogo käest valitsusõ kokkopandmisõs volitusõ saanuq või Riigikogo üles säet pääministrikandidaat om tälle ette säädnüq valitsusõ kuunsaiso.
Ministri nimmas ammõtihe Vabariigi President pääministri käest saadu ettepanõgi kättesaamisõst kolmõ päävä joosul. Valitsus või ministri nimmatas ammõtihe presidendi otsusõga, miä ilmutadas Riigi Teedüstäjän (Riigi Teataja).
Valitsus või ministri ast ammõtihe ammõdivandõ andmisõga Riigikogo iin: "Asudes täitma valitsuse liikme kohustusi, olen teadlik, et kannan selles ametis vastutust Eesti Vabariigi ja oma südametunnistuse ees. Tõotan pühalikult jääda ustavaks Eesti Vabariigi põhiseaduslikule korrale ning pühendada oma jõu eesti rahva heaolu ja tuleviku kindlustamisele."
Valitsusõ ammõtihe astmisõ man and suulidsõ ammõdivandõ pääministri. Pääle tuu kirotasõq vandõ tekstile alaq kõik ammõtihe astva valitsusõ liikmõq. Ministri, kiä ast ammõtihe pääle valitsisõ ammõtihe astmist, and suulidsõ ammõdivandõ ja kirotas vandõtekstile alaq, ku pääminstri om man.