Sigur Rós

Sigur Rós (islandikeeline välläütlemine: [ˈsɪːɣ̞ʏɾ ˌroːus]) om 1994. aastagal Reykjavíkin kokko tulnuq islandi postrokk'-artrokk' ansambli^[1]. Näq ommaq teedäq uma lindlõva helü, laulja Jónsi falseti ja puugnaga kitra mäng'mise perrä.^[2] Aastidõ joosul ommaq naq võitnuq hulga avvuhindu.

Aolugu

Ansambli panniq 1994. aastaga põimukuun kokko Jon Þór Birgisson, kiä laul, Georg Hólm, kiä mäng bass'kitra ja bändi edimäne trummilüüjä Ágúst Ævar Gunnarsson, kiä pääle viit aastagat opmisõ peräst bändist ärq läts'. Pääle tuud pess' trummi Orri Páll Dýrason, a 2018. aastaga süküskuun pantiq tälle süüs vägüstämist ni tä lõpõt' aotilidsõlt ärq.

Jónsi oll' ainukõnõ, kiä mõist' lauldaq. Tä om gei ja ütest silmäst sõkõ.

Ansambli nimi om keelevikur' – sõnaq tähendäseq eräle võitu ja ruusi, a ütenkuun islandikeelist naasõnimme Sigurrós.^[3]

Albumiq

"Von" (1997)

Ansambli edimäne album "Von" (islandi keelen "Luutus") tull' vällä 14. piimäkuul 1997. Islandi kriitiguq külq kitsevä albumit^[4], a naq möiq ynnõ 313 plaati. Ildampa, kuq naidõ järg'mädseq albumiq välämaal popis saiõ, naati ka sjood edimäst albumit rohkõmb kullõma.

Edimäne lugu kand' ansambliga ütte nimmõ – Sigur Rós. Kuvvõndan luun olõ-õi üttegi hellü, ynnõ 18 sekundit vaikust. Tuu perrä ka nimi – "18 sekúndur fyrir sólarupprás" ("18 sekundit inne päävänõsõngut").

"Ágætis byrjun" (1999)

"Ágætis byrjun" sai Sigur Rósi edimädses popis albumis. Indsilidselt tähendäs "Ágætis byrjun" islandi keelen "Hää alostus". Kontsõrdil mäng' Jónsi kitra tsello puugnaga, pääle tuud om sääne mängmine naile esiqeräline.

Muusigakriitikigidõ võrgoväreht Metacritic and' albumilõ 87 punkti 100st.^[5]

Album om vällä tuudu ka raamatun "1001 Albums You must Hear Before You Die" ("1001 albumit, midä piät inne kuulmist kullõma") ^[6]

"( )" (2002)

Nimeldäq album' tull' vällä 28. rehekuul 2002. aastagal. Albumll om kats' puult: edimädseq nelli laulu ommaq kergembäq ni eloryymsaq, tagomadsõq nelli ikulidsõq. Naidõ vaihõl om 36 sekundit vaikust.

Kyik lauluq ommaq Vonlenska keelen, luutusõmaa keelen, kiil, minkal olõ-õi tähendüst. Synaq "You xylo. You xylo no fi lo. You so." kõrdasõq eri muudu terve albumi joosul. ^[7]

Ameeriga aokiri Pitchfork nimmas albumi "( )" 2002. aastaga 50 parõmba albumi sisse.^[8]

"Takk..." (2005)

Sigur Rósi nelläs album "Takk..." ("Aiteh...") tull' vällä 12. süküskuul 2005. Album mäng pal'l'o taktimõõtõga.

Üle maailma müüdi päält 800 000 plaadi.

Inglüse kavvõhelü BBC pruuk' ja om sagõlõ pruuknu "Takk..." albumi laulõ uma saatidõ ja reklaamõ seen. Plaadi laulõ või kuuldaq ka mitmõl puul ameeriga telesarju seen.

"Með suð í eyrum við spilum endalaust" (2008)

"Með suð í eyrum við spilum endalaust" ("Summin kõrvu seen miiq lõpmaldaq mängi") tull' vällä 20. piimäkuul 2008. Muusiga lätt' seon albumin kavvõmbalõ ansamblilõ tüübilidsest lindlõvast helüst.

Edimält olliq kyik lauluq inglüse keelen, a bändi liikmõq ütliq, et islandi kiil om näile loomuperädsemb.

"Valtari" (2012)

Kuvvõs album "Valtari" ("Rollõŕ") tull' vällä 2012. aastaga lehekuun. Albumi helü oll' rohkõmb elektroonilinõ.

Arvostajaq võtsõq albumi häste vasta. Metacritic andsõ albumilõ 74 punkti 100st. ^[9]

"Kveikur" (2013)

Säitsmes album "Kveikur" tull' vällä 2013. aastagal. Bändi liikmõq esiq ütliq, et taa album om "kurjõmb, pääletükjämb" ku albumiq inne taad.

Kõik lauluq ommaq islandi keelen.

"Átta" (2023)

Átta om päält kümne aastaga edimäne Sigur Rósi album'. Albumi pääl mäng ka klahvõ mängjä Kjartan Sveinsson, kiä 2013. aastaga bändist ärq läts ja 2022. aastaga tagasi tull'. "Átta" pääl om kümme luku, kokko 56 minutit ja 34 sekundit.

Vonlenska

Vonlenska, inglüse keelen Hopelandic – luutusõ kiil – olõ-õiq loomuligult säädünüq egaq vällä märgüt' kiil, a tsilbiq ja helüq, minkal olõ-õiq tähendüst. Vonlenska sai nime edimädse albumi "Von" perrä. Noilõ, kiä islandi kiilt mõista-aiq, olõ-õiq vaiht, selle et korgõq helüq ommaq islandi keelega väega üttemuudu ja tege islandi kiilt perrä.

Inämbäste ommaq naidõ lauluq õks islandi keelen, luutusõ keelen lauldas õnnõ ütsikid ritu. Mõni laul om nail ka inglüse keelen.

Liikmõq

Põrõldsõq liikmõq

Jón Þór Birgisson ehk Jónsi – laulminõ, kitra, puugnaga kitra, bass'kitra, klahviq, banjo, huulõpill' (1994–)
Georg Hólm – bass'kitra, kellamäng, klahviq, põh'a laulminõ (1994–)
Kjartan Sveinsson – klahviq, klavvõr', hõrilaq, kitra, põh'a laulminõ, flüüt', oboe (1998–2013; 2022–)

Inneskidseq liikmõq

Ágúst Ævar Gunnarsson – trummiq, lüük'pilliq (1994–1999)
Orri Páll Dýrason – trummiq, lüük'pilliq, klahviq (1999–2018)

Lätteq

↑ https://sigurros.com/band/faq.php#03
↑ https://www.telegraph.co.uk/culture/music/3555264/The-gods-play-games-with-Sigur-Ros.html
↑ https://sigurros.com/band/faq.php#04
↑ https://www.metacritic.com/music/von
↑ https://www.metacritic.com/music/agatis-byrjun/sigur-ros
↑ Dimery, Robert; Lydon, Michael (2010). 1001 Albums You Must Hear Before You Die: Revised and Updated Edition. New York City: Universe. ISBN 978-0-7893-2074-2.
↑ https://web.archive.org/web/20121025122237/http://pitchfork.com/reviews/albums/7152-sigur-ros/
↑ https://pitchfork.com/features/lists-and-guides/5888-top-50-albums-of-2002/?page=3
↑ https://www.metacritic.com/music/valtari

[1] ttps://sigurros.com/band/faq.php#03

[2] ttps://www.telegraph.co.uk/culture/music/3555264/The-gods-play-games-with-Sigur-Ros.html

[3] ttps://sigurros.com/band/faq.php#04

[4] ttps://www.metacritic.com/music/von

[5] ttps://www.metacritic.com/music/agatis-byrjun/sigur-ros

[6] Dimery, Robert; Lydon, Michael (2010). 1001 Albums You Must Hear Before You Die: Revised and Updated Edition. New York City: Universe. ISBN 978-0-7893-2074-2.

[7] ttps://web.archive.org/web/20121025122237/http://pitchfork.com/reviews/albums/7152-sigur-ros/

[8] ttps://pitchfork.com/features/lists-and-guides/5888-top-50-albums-of-2002/?page=3

[9] ttps://www.metacritic.com/music/valtari

[1]

[2]

[3]

[4]

[5]

[6]

[7]

[8]

[9]