Õuruupa Keskpank

Õuruupa Keskpank om Õuruupa Liidu institutsioon, miä vastutas rahapoliitiga iist riigeh, miä ommava võtnu tarvitusõlõ ütise raha õuro (Austria, Belgiä, Eesti, Hispaania, Holland, Iirimaa, Itaalia, Kreeka, Küprüs, Leedu, Luksõmburk, Läti, Malta, Portugal, Prantsusmaa, S'aksamaa, Slovakkia, Sloveeniä ja Soomõ).

Õuruupa Keskpanga tarõ Frankfurdin.

Üteh noide 19 riigi keskpanguga moodustas Õuruupa Keskpank Õurosüsteemi.

Eesti Panga president esindäs Eestit Õuruupa Keskpanga nõvvokogoh, miä määräs, ku korgõ vai madala omma õurot pruukvih maiõh baasintressimäärä, minkäga panga saava keskpangast laina võtta vai umma rahha keskpangah hoita. Baasintressimäärä mõotasõ intressimääru, midä panga umilõ klientele masva raha hoitmise iist pangah ni võtva ummilt klientel pangast võetuisi lainu iist.

Õuruupa Keskpank piät intressimääru säädmise ja muiõ rahapoliitiga riistuga hoitma hinna õurot pruukvih maiõh kimmä, niimoodu õt hinna pallo kipõst es kasunu. Õuruupa Keskpanga siht om hoita inflatsiooni keskpika ao joosul 2 protsendi lähküh.

Õuruupa Keskpank om üts säidsmest Õuruupa Liidu institutsioonist.

Õuruupa Keskpank om Frankfurdin S'aksamaal.

Õuruupa Liidu institutsiooniq
Õuruupa Parlament – Õuruupa Ülembkogo – Õuruupa Liidu Nõvvokogo – Õuruupa Kommisjon – Õuruupa Liidu Kohus – Õuruupa Keskpank – Õuruupa Kontrollikoda